【銅鑼灣】「集郵芒」王秀琳（Mango）又有新觀音兵，前日下晝兩點，佢着件低V衫踢對人字拖行銅鑼灣，身邊有位黑超男傍住，兩人入咗利園商場後，Mango走去名店LV門口挑機，攞部手機出嚟影海報，之前LV控告小商戶侵權，黃夏蕙帶格仔餅去中環LV旗艦店挑機。不過Mango今次嘅挑機行動，似乎同撐小商戶冇乜關係，純粹覺得海報靚影相留念，而男伴就乖乖企埋一邊，影完相佢哋冇入去濕平，反而搭𨋢上樓。
不停撩傾偈
兩人行去搭𨋢嗰陣，黑超男不停撩Mango傾偈，頻頻轉頭望住Mango，仲指手畫腳表情多多，不過Mango似乎冇乜反應，仲擰轉面唔望男方，睇嚟呢位觀音兵都係浪費口水。
揸瑪沙拉蒂
Mango同新歡連日黐纏，噚日下晝5點Mango衫都冇換又孖咇出巡，新歡揸瑪莎拉蒂媾女戰車去跑馬地車行傾嘢，之後送Mango去銀行撳機，再做柴可夫車Mango去大坑嘅髮型屋，然後揸車走人，Mango喺門口同髮型師傾咗幾句，突然人有三急要去隔籬餐廳借厠所，由於地下又濕又滑，個髮型師仲好有風度扶佢㖭。
Mango舊年尾投資7位數喺中環開夜店，身邊唔只男伴車輪轉，連同性緣一樣咁旺，前幾日先喺Instagram擺咗張咀女相，隔兩日又同傳過緋聞嘅林德信夜蒲，真係男女通殺。
採訪、攝影：徐錦池、楊浩賢、羅德光、梁繼光
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/