恭喜晒！噚日有18個警官再上一層樓，由警司升為高級警司。升級時時有，今次特別在其中有一個可能係「轉世靈童」，即係隔代、隔代、隔代「一哥」人選。
八方聽聞，現職行動科反恐怖活動及內部保安組嘅梁珣警司，備受領導信任，獲重點栽培，有人話佢幾乎「食緊蜂皇漿等做蜂后」。原來梁珣自總督察起，做過幾個部門，都被視為好位，包括警察學院、國際刑警和內部保安，特別內部保安呢個部門，必須得到老細信任，而且寫落履歷時，亦較其他一般職位更突出，加上呢類位置出事機會低，又有機會招呼外賓，難怪唔少同袍睇好，指佢係隔代一哥大熱。