根據本報李華華所講，光大銀行每次話要嚟香港上市，中港股市都跌到一仆一碌。不過講到邪門，李華華自己都唔弱，事關佢每次訪問完唐牛每日拜讀嘅〈300萬爽組合〉領先選手，之後表現都會嚴重走樣，強如沈大師，倉內兩隻熊證都先後打靶，讀者袁健培亦顯得進退失據，下次各位參賽者收到李華華訪問邀請，務必三思。
港股噚日chok到爆，表現靚仔以績優股佔多數，華潤燃氣（1193）交出亮麗業績，一眾燃氣股發力炒上。上月底曾推介零售股堡獅龍（592），貪佢業績改善兼派息吸引，放榜翌日大升9%，其後喺0.425至0.44元整固，噚日大成交突破橫行區，有望再上一層樓。截至去年底，堡獅龍中期少賺42%至3,409萬銀，但與上一年度下半年比較，則成功扭虧為盈，毛利率回升至47.7%，現價息率3.8厘，淨現金佔市值逾半，財政穩健；早前未跟進嘅戰友可於0.445元買入，短線博升一成，跌穿0.425元止蝕。
唐牛