早兩日在一個商務酒會中，遇上了幾位相識的「獨女（獨立女性）」，經濟足以自主，賺錢好大可能都係為咗買花戴。不過，唔知係咪為咗遷就我，佢哋嘅話題竟然唔係行街血拼，而係都幾認真咁分析地產市場。樓市果然係本地一個不死的話題，無論何時何地，你總會發現有人都好想同你分享心得。
其中一位係年近四十、事業有成嘅典型中產（點都唔係財爺嗰隻）女性，即係唔算有錢，但一年總會豪買兩至三個名牌袋，兼會去歐洲掃貨嗰種。早年結婚置業，近排先至興起換樓念頭，但樓都未睇已被打沉，皆因政府新一輪政策，正正以印花稅去打擊買第二甚至N個物業的買家。而這招卻打破了不少換樓人士的好夢。以呢位女士為例，就係因為要畀多十零廿萬元的印花稅（即係冇咗嗰幾個袋），而失了預算，惟有按兵不動，再等吓先入市。
事先張揚 更顯束手無策
睇到呢度，我相信除咗啲官員會認X認Y外，各位都唔會咁天真當正啲新招真係咁有效。查實如果買家真係有「食力」嘅投資者，那怕你加重稅，只要係錢可以解決嘅問題都不成障礙。所謂羊毛出在羊身上，最後所有成本不過又轉嫁至真正用家身上，尤其是家陣很多樓市炒家都係強國人，他們在香港置業不過是為資金找尋「陽光」道路罷了。
香港的樓市問題，無論對哪一屆政府來說，都是一個燙手山芋，不過，今屆政府事先張揚話要主打房屋政策，咪更加凸顯咗佢哋束手無策。睇佢哋係咁大耍棍花，出完一招又一招，個市就好似叫狗咁，越叫越走。尤其係一手新樓市場，發展商減價、加佣、幫買家畀釐印費等招各出，即時令一手樓的成交增加，有個新樓盤因為開價只係300零萬，所以一晚之內已售出300個單位，比起政府對市況反應遲緩兼落錯藥，明顯技勝一籌。當有人忙於輸送利益，以批地回饋支持的同時，另邊廂又有發展商積極賣樓套現之餘，仲可以益埋自己員工賺番筆。所以與其話香港地產權霸一方，倒不如直認只係政府勢弱多時。
今個星期本港幾間大銀行帶頭加息，是否春江鴨就見仁見智，樓價會否因而轉頭下調，大家即管拭目以待。
至於二手成交慘淡，很多代理又叫苦連天，啲媒體更加講到代理就快無飯開咁，咁樓市當旺嗰陣，代理們大魚大肉，魚翅撈飯又唔見佢哋會攞啲去扶貧。況且呢排啲發展商都出盡高佣（高達6%）重賞代理催谷旗下樓盤。如以上面大賣嘅新盤為例，若有6%佣金，就算每個代理只能開到一張單，計落都有成廿萬佣，仲想點呀？所以惟盼一眾因為所謂減價、兼且耳仔軟嘅小羊買家，不要一窩蜂擁入市，而罔顧供樓利息逆轉後的負擔，否則最終淪為名符其實的樓奴。
盧先亞