南韓第一位女總統朴槿惠上月剛上任，顯示南韓女性地位抬頭，但當地金融業嚴重陽盛陰衰，單計南韓央行230名高級職員，只係得3名女性，男女比例仲低過香港上市公司董事。南韓央行有位女高層最近接受彭博訪問，諗番初入行嘅不公平對待，仍然氣難平！
49歲嘅Suh Young Kyung，同朴槿惠一樣喺大邱出世，佢喺1988年加入南韓央行，話當年做新人，眼見男職員每季都有服裝津貼，於是問上司點解自己冇份，點知上司竟然話，佢可以着番中學套校服返工！
不過風水輪流轉，南韓𠵱家由女人揸fit，Suh今年亦升做央行金融市場部主管，成為該行史上職級最高嘅女職員，亦係負責議息嘅貨幣政策委員會中唯一女性，總算吐氣揚眉，為南韓女人出番口氣。