理大舞蹈學會（DanSo）憑着一齣以反國教、爭取自由為主題，名為《香港人》嘅舞蹈表演，上個月贏得全港大專聯校邀請賽冠軍，表演片段在網上瘋傳，但一直被指抄襲香港演藝學院一段名為《Sinking Water》嘅畢業作品。
舞蹈比賽嘅主辦單位近日發表聲明，話收到有人投訴指《香港人》部份舞段涉抄襲《Sinking Water》，即時成立調查小組徹查，最後決定撤回理大嘅冠軍名銜。但DanSo不服，發聲明否認抄襲，批評大會又冇講明《香港人》違反邊條規則，武斷撤回獎項好唔公平，仲嚴重影響DanSo聲譽，決定暫停參加大會舉辦嘅所有活動，擺明唔玩！