內地興講反貪腐，恒隆地產（101）主席陳啟宗應吓景，喺集團最新年報嘅主席報告度話，好多人都指喺內地做生意最緊要有「關係」，但係內地嘅貪污現象可能比西方發達國家更普遍，因此佢哋要更加謹慎咁使用「關係」。
陳主席講到明，除非有合情合理嘅實際需要，否則唔會主動接觸政府官員，亦絕對唔會籠絡地方或者中央領導人，亦從來唔送贈昂貴禮品。佢又自爆話喺大約20年前，有人提議佢接觸內地一位據稱有助土地交易嘅高級政府官員，但陳主席見完佢之後覺得唔對路，再加上其他原因，最後放棄發展嗰個城市；後來呢位高級官員就因為貪污被補，陳主席就認叻話自己直覺好準𠻹。
話時話，陳主席喺呢篇主席報告提到舊年有兩位執董離職，強調集團「只選好的、只做對的」，唔知有乜弦外之音？