長實（001）上月拆售雍澄軒，搞到政府陣腳大亂，有超人呢個強勁後盾，加埋趙國雄一句「超值」，令買家齊齊衝入市。土地註冊處資料顯示，原來唔少財演如黃德几、林一鳴，當日都有份做超人信徒，噚日提到的長實營業部女將，有位摩出大賺60萬成功割禾青。財演呢？仲未走到貨，話長線投資喎！
德几揼心：叠埋心水收租
金利豐證券研究部執董黃德几（Dickie）同華華講，話買雍澄軒諗住係一個可收息或者賺錢嘅投資，但估唔到政府加辣招出手咁重，「𠵱家變咗叠埋心水收租」。佢又大鬧政府呢招「白癡」，話只會減少市場供應，令佢哋失晒預算，真係聽到好酸。
中信証券國際執董林一鳴（Eddie）就話，雍澄軒個單位仲未賣，當日透過長實用「VIP認購價」，469.3萬買入，認為呢種物業投資好常見，「歐洲、美國同澳洲都好多，兼且仲有人幫佢搞埋出租，唔使煩」，仲話「收租有4厘回報，好過其他買樓收租單位」。
一鳴死撐：有4厘回報
今次Eddie同佢老婆一齊買，完全冇幻想空間！路邊社消息指，買雍澄軒的財圈中人絕對唔止呢幾個。
資料顯示，三位與長實營業部經理同名嘅女士，其中曹皎明當日以296.9萬買入11樓1室，11日後摩出，賺61.1萬，平均每日賺5.55萬，好過返工。封海倫嗰間揸貨較短，賬面都賺34.1萬。其他買家，真係恨唔到更多！
李華華
mailto:[email protected]