菲菲曾講過當化妝化到近乎易容境界，其實與行騙無異。話之自己妝前妝後兩個樣，總之無時無刻化到靚爆鏡，等「目標」嗒咗糖先算。
醜婦終須見家翁，外國有調查發現，八成女人會拍拖後一個月，先畀男朋友見自己素顏樣。皆因一個月後感情稍為穩定，加上大致摸清對方底牌，屆時做番自己，相信對方接受能力會較高。
世上所有嘢，只要包裝靚少少，市場都會畀個溢價。女人化得靚，可擴大自己市場；公司上市前盤數執得靚，推高招股價，籌夠錢後真係乜都得。
好似今年上市嘅半新股迅捷（540）、滉達富（1348）咁，掛牌前又話熱爆，仲掀起新股潮，點之唔使半個月，即時畀個「素顏look」你睇，跌穿招股價後直插。去年初掛牌嘅允升（1315），半年後驚嚇公佈全年賺少四成，近日大股東仲話想轉讓控股權，連佢都跳船，更加證明股份同女人一樣，都可以妝前妝後兩個樣。所以呢，新股真係咪亂炒。
Fifi
本欄逢周二、四刊出