老麥近日推出咖喱漢堡，賣相嚇親唔少人，因為個包啲咖喱汁多到咇晒出嚟，一打開個包已經成手都係，即時令人聯想起「便便」。高登友本周更舉辦「咖喱漢堡攝影比賽」，震撼港台同胞，連台灣東森網都有報道。
參加呢個比賽要嚴守規條，包括嚴禁用真便便參賽。大會評分準則包括色澤、故事性同「爛屎度」，𠵱家最多人like嘅係一張咖喱汁四濺，搞到個包、包裝紙、手腕都係咖喱汁嘅相，驚嚇度爆晒燈。而截至噚日，參賽相片差唔多有成100張。估唔到呢件事竟然震撼到台灣，當地東森網都有報道香港呢件大事，寸寸貢話「這年頭，甚麼比賽都能辦」。