中港股市近排弱過藥煲，元凶竟然係光大銀行！呢間市值逾千億嘅A股內銀巨無霸，近日重提來港上市大計，短期會向港交所（388）遞表。但翻查紀錄，光銀個底認真麻麻，近年兩度提出南下掛牌後，中港股市都會輪流食瀉藥，搞到上市計劃一拖再拖。
話說光銀喺2011年2月首度宣佈來港上市，點知冇幾耐歐豬病發，希臘爆出違約危機，加上內地經濟又疑似硬着陸，同年6月光銀無奈地打退堂鼓，其間中港股市齊齊下跌6%。舊年中，眼見市況好轉，光銀立即捲土重來，但內地五行欠水，A股兩個幾月怒插一成，計劃再次擱置。到咗呢個星期二，鬥志可嘉嘅光銀發通告話要再搞上市，兩地股市就連跌兩日，真係邪到冇朋友！