和一位在內地工作的零售公司管理層閒談，他說近年在大陸做生意，最擔心嘅嘢已經唔係老翻，而係微博。例如肯德基事件，就充份令作為老一輩的他明白，消息在中國可以流傳得有多快、發酵得有幾勁。唔好睇小任何一個小小的流言，它可以傷害你好深。能否扭轉乾坤，就睇你如何反應。
好似肯德基的母公司百勝（Yum！）集團，佢已經係近20年來進入中國最成功的外資公司，過去幾年平均每18個鐘就會喺中國開一間分店，分店總數逾5,300間，贏對手老麥成條街。但一單速成雞事件，就足以令肯德基1月份同店銷售急跌超過40%。當市場以為肯德基起碼要到今年年底先可復原，誰知2月佢銷售就已經反彈返去和往年持平。雖然唔可以話已經完全走出泥沼，但肯德基的及時反應，加強外界溝通，甚至破例每月公佈銷售數據穩定軍心，似乎都起到一定的作用。
睇返味千（538），佢一年半前的豬骨湯事件，其實並唔牽涉食品安全，但公司一開始冷待事件的處理手法，卻令品牌受到嚴重損害，唔老實的形象深入民心。直到近半年業績改善，其實都只靠基數低的數字遊戲，人流、生意未見真正復蘇。要返回危機前的營運水平，機會渺茫。
海迪