【記者張嘉雯報道】「既然安排我在這個時間路過，就讓我留下屬於我的記號。」楊匡如是說。他的名字，一年內在報紙頭版出現至少兩次，一次激起中日對罵，一次引來國保動粗，兩次上報的原因看似矛盾，卻隱然共通。這位首個在內地直接參與維權抗爭的香港人，看似吃了豹子膽，其實心懷中國夢，登釣島、探劉霞，他的下一步，是招募香港有心人一起到內地維權。
楊匡說，名字中的匡字，有把錯誤改正的意思，由祖父所取，問他連串行動會否影響內地家人的安全，他指一指天：「怕咩？有佢照住。」楊匡父系四代是基督徒，耳濡目染，遺傳家族硬頸性格，加上父母皆知識分子，把爭民主的希望都放在兒子身上：「佢哋希望我做我認為啱嘅事。」
保釣身份易交朋友
當過冷氣技工，做過網台台長，楊匡生活儉樸，去年成功登島後，開始在內地闖蕩，形容保釣船長的身份猶如是友誼「敲門石」：「我喺呢段時間認識咗好多朋友，大家都有同一樣嘅心願，為未來中國更加美好而出一份力。」
過去半年，他開始在街頭宣傳釋放民運人士的訊息：「好想喺資訊完全封閉嘅地方發揮作用，有啲嘢，你以為唔可以講，但你喺街頭公開講，又唔一定有事，至少我哋可以講出真相。」其中一個他認識到的朋友，就是同行探望劉霞的劉沙沙。
兩人先到川中監獄探望劉賢斌，之後到北京，「第一日就買咗花，去木樨地路祭，點知網上嘅反應好大，只要係對中國未來有感覺嘅人，都會好緊張。」時近3.8婦女節，兩人又想到探望被軟禁的劉霞，結果同行者全部被帶回住處，楊匡翌日重回，卻演變成神秘人打記者。
同行內地人屢被打
首次出征，楊匡不是沒部署，連被捕也計算在內，他說付出的其實不算多：「我呢啲算係咩呀，我仲可自由自在喺街度行，劉沙沙先真係堅，好多次都俾人打到豬頭咁。」問他可以為中國民主付上甚麼代價，他卻答，自己的性命。
「有啲喺香港好平常嘅事，喺大陸要做代價就要好大，要記住中國無民主，香港都唔會有民主，中國無自由，香港嘅自由都會越來越萎縮，只有不斷抗爭，同內地朋友並肩作戰。」他鼓勵巿民不要拘泥地域。曾經在89民運期間坐牢15個月的他，直言不敢放棄，「有時攰，想停落嚟，但你點樣可以放棄呢？」
他對認識到抗爭拍檔劉沙沙感欣慰：「佢畀咗好多經驗我，相信我好快適應到裏面嘅抗爭生活。」他又已經準備好下次北上的抗爭行動，今次的名單將有其他香港人。