睇開〈魚樂無窮〉嘅戰友都知道，拉麵股味千（538）唔係唐牛杯茶，但最新公佈業績卻令人刮目相看，唔排除會觸發新一輪基金搶貨潮，升到你唔信。
味千去年盈利1.5億銀，倒退56%，看似肉酸，但將業績拆開睇，下半年賺1.1億銀，較上半年勁升1.3倍。雖然盈利靚仔涉及滙兌收益，但最能反映營運表現嘅同店銷售明顯有改善，中國市場跌幅由上半年24.7%收窄至全年12.6%，整體經營活動現金流按半年增27%，業績見底味濃。人工及租金成本按半年亦微跌2%，反映控制成本得宜。集團維持息誘政策，全年派息14.39仙，派息比率超過100%，現價息率2.3厘。最重要係股價一直弱過藥煲，放榜前貼住5蚊邊嘅近年低位，絕冇好消息出貨壓力。味千噚日逆市飆升17%，收報6.24元，剛好處於舊年1月以來嘅下降軌，一旦升穿，坐七望八絕非難事，以噚日大手平均價約6元水平作止蝕位參與，贏面甚高。
唐牛