大酒店（045）旗下半島近年賣嘉麟樓奶黃月餅，賣到上港聞版，舊年幾百人排隊搶購，向隅者眾，最終要驚動警方。大酒店CEO郭敬文噚日預告，今年會改變賣月餅方法，上網預訂就得，大家唔使走去排隊喇。之但係，佢有冇預計網絡塞車呢？到時大家只能夠對住個「芒」鼓譟了。
講完食，講番間酒店，半島已經完成首期翻新工程。現場所見，翻新過嘅房間望落普通，原來加咗高科技元素。其中一間豪華海景房，全房嘅燈、溫度、窗簾、冷氣，連埋電視遙控都用一部平板電腦操作，叫room service都可以用部機直接向服務部作出指示。呢間房一晚盛惠19,800元另加10%服務費，加價25%。