煲呔𠵱家身在台灣，同太太大玩一番。查實佢就算去到天涯海角，都心繫禮賓府。唔係話佢戀棧特首個位，而係佢掛住成日同佢分享心事嘅錦鯉。
專家話唔一定要恒溫池
時裝雜誌《ELLE MEN》內地版早前專訪煲呔，煲呔提到卸任後，好多時間住喺內地，閒時打吓高爾夫球觀吓雀，自爆最近就喺香港同內地，拍咗唔少稀有嘅黑臉琵鷺，代價就係成日俾蚊咬。
煲呔寄情雀鳥，查實可能同佢與禮賓府內嘅錦鯉要天各一方有關。煲呔話，𠵱家都仲好掛住啲錦鯉；卸任時想帶走佢哋，可惜住唔到「深圳禮賓府」，由於啲錦鯉已經成廿幾歲，擔心搬嚟搬去會對佢哋「不利」，加上班朋友已經喺禮賓府好食好住咗七年，所以都係託孤狼振英，由禮賓府管家好好照顧。
煲呔仲自爆，禮賓府個錦鯉池有恒溫系統，冬天可以保暖。但有專家話，查實唔使用恒溫池都一樣得。海港錦鯉集團嘅陳先生話：「錦鯉係唔怕凍，日本野生錦鯉結晒冰都唔怕」，強調水族館用恒溫池養錦鯉，係唔想啲魚冬天時唔郁唔游唔食嘢，為咗增加觀賞價值先加熱，自己喺屋企養，就唔多需要恒溫。同樣有養錦鯉嘅元朗十八鄉鄉委會主席梁福元話，只係用井水養錦鯉咋，一樣肥肥白白。香港錦鯉協會嘅謝先生都話，香港冬天凍極有限，查實用番自然水溫養錦鯉已經好okay。
特首辦發言人派定心丸，話啲錦鯉喺魚池內好好生活。唔知煲呔若然要探朋友，狼振英准唔准？
http://[email protected]