財爺話飲咖啡、看法國電影就是中產，但事實係點？所謂民意民生不是靠想像，是要從生活中觀察。以下四位中產人沒有剖析咖啡之味及法國電影的拍攝手法，反而愛談時裝談旅行。他們反諷無論從薪金或生活態度，財爺早已Outdated！
記者：雷福財
攝影：林栢鈞、陳永威（部份圖片由受訪者提供）
時裝精公關 日花10萬元買衫
講起時裝精，娛樂圈中會想起Wyman及阿徐；在公關及中產界則有Francis Cheng。Francis現為天機公關的CEO，一年要交10幾萬元稅，老闆是何超瓊。Francis自言最大興趣一定是時裝，不熱衷法國電影，最怕那慢拍的節奏。
訪問當日與Francis走到他平日最愛行的名店Joyce，為配合拍攝，他穿的不是當季店內服飾，而是私伙衫（其實也是本季服飾），一身Givenchy、MIHARAYASUHIRO、Cartier……對靚衫有執着，「每年三月及九月都是開季入貨時候，減價都會買，但會留意下季興乜再揀入手貨，例如下季豹紋、動物圖案會Hit，減價時就買呢幾類服飾，可耐穿一點。以前試過一日買超過10萬元衫，當然肉赤，但希望自己眼光正確，因為好衫不會只穿一季。現在Francis成熟了，更考究配搭功力，「有些品牌的當季Signature點都要買，畢竟做公關呢行，最易打開話題的是時裝及旅行，好像Givenchy及McQueen呢類中上價品牌，再配搭一些其他本地品牌，這樣才考穿衣功力。」
對Francis來說，優質生活就是能夠有一天可以買衫唔睇價錢牌。另外他認為身為中產有時為搵錢及保持生活水準，要付出超長工作時間，忽略健康，「我經常叫身邊朋友注重身體，唔好咁搏，自己也保持固定的運動量。」
作為中產，對財爺份報告有甚麼看法？Francis說：「我剛在發表報告後上車，買了一個半山單位，比公佈前下跌15%！因為覺得價錢合理就買，講到底最終靠自己努力，我覺得搵錢要快過通脹及樓價升幅，投資才是最實際。」
髮型店老闆 最愛Lanvin
城中知名髮型店Marek Art of Hair，客仔包括名媛闊太、名模明星，身為老闆的Marek Wan對衣着講求風格及整齊，不盲追名牌，有時更趁減價入貨，不算是名牌奴，亦不愛法國電影。「自己最愛的時裝品牌是Lanvin，它的細節位總是出現在合適地方，由顏色到包裝設計都極吸引，每年到巴黎公幹時總會入貨。」人成熟了，有家庭女兒要照顧，點使錢都要計住，好多時趁網上減價會買長青款恤衫，好似今日穿着的Neil Barrett便是減價貨。「我以前好鍾意跑車，買過保時捷，但𠵱家只會揸Honda七人車。平日放假最大的消遣是邊煮飯邊聽歌、行山、飲紅酒，但唔會睇法國電影，反而《一代宗師》是一套浪漫又文藝的功夫片，很出色。」
家住寶馬山，一年交六位數字稅，自謙未有資格做財爺口中的中產，但被問到那份財政預算案，聽來彈多過讚，以生意人角度看，曾生連投資回報還未做到，Marek說：「係咪幫到中產？咁實有少少，咪當請你吃個便飯囉，但真正能改善生活就做唔到，一切的計劃都很短暫，欠缺遠見。其實同投資一樣，你放幾多喺社會，就會預計未來幾年有甚麼回報，政府使錢應投資在醫療、教育、發展經濟及文化上，唔知係咪被人鬧得多唔敢做，又或者係出自打工仔心態。」現時位於中環的Salon又加了20%租金，中產搵得多，同樣使得多。
Loewe公關 最愛網購
現為Loewe亞太區公關及媒體經理的Adrian Wong，是馬來西亞華僑，屬馬拉中產階級，於加拿大大學畢業後便隻身來港工作，現已是香港永久居民。講到服飾要求，Adrian遇上Event或隆重場合會穿自家公司服飾，近年愛網上Shopping，彈指間越買越多，更專攻個人Signature之物，「自己平日着衫不太講究名牌，反而鍾情美牌，例如J.Crew，網上買更可以加有個人特色，例如於毛衣及手袋飾上AW字樣。我試過一個月買過萬元衫，買完又開始唔興，都有點後悔。」與馬來西亞相比，香港的中產較着重職業職位及階級收入，「馬來西亞人性格好易滿足，大部份中產未必個個都有野心想越升越高級，加上喺吉隆坡買約700呎單位只係約150萬港幣，在香港要500萬元。喺馬拉生活無咁大壓力，但我反而享受喺香港工作，有挑戰性、市場夠大。」
Adrain現在目標反而是儲錢買樓，克制購物，政府無得靠便要靠自己，希望將來日子可繼續升職。
心理學博士 不求衣着愛旅行
職業銜頭多多的Rene Lien，是心理學博士、催眠師、性學家，還擔任香港催眠醫師及心理治療師公會主席，家住及工作都在上環。對於衣着，他謂只靠西裝走天涯，「Armani剪裁最靚，Hugo Boss及Dior Homme都不俗，但最愛還是訂做，我對品牌不講究，好多時訂做一套約$4,000便可。」
Rene最肯花錢的地方是飲食及旅行，「一年去兩次旅行，上年初去完北極及年尾再去南極，每程花費幾十萬元亦不肉赤。其實中產的生活就是追求生活開心，身邊好多中產朋友都好留意牌子、搵靚酒飲、買車同旅行，但若以財爺的標準定義，我哋仲有10年都未到中產！」
有人愛花錢，有人會揀用得其所，Rene放假最愛上YouTube學煮餸，「放假愛同太太齊落廚，發覺煮一餐抵過去餐廳食，中產人都要精打細算。問Rene點睇財爺份報告？「我諗唔到點樣成為財爺口中的中產，原來身邊有幾部車的人，亦非他口中所說的中產，我需細嚼他想表達甚麼！」
