銅鑼灣舖租貴到飛起已經唔係新聞，噚日食晏遇到銅鑼灣富豪酒家（阿翁鮑魚）老闆翁仰光，佢氣憤難平爆料，話富臨飯店（阿一鮑魚）𠵱家租緊駱克道個舖，早排市傳有人肯用140萬承租，嚇到富臨老闆楊貫一走夾唔抖，諗住轉租附近信和廣場，查實駱克道個舖唔係咁多人吼。
翠華都租唔起
阿翁同阿一鮑魚都屬於名人飯堂，翁仰光原先都喺阿一打工，96年創業開呢間富豪酒家，難怪佢特別關注阿一嘅情況。
一講到舖租，翁老闆就相當激動，話阿一鮑魚𠵱家個舖月租約70萬，早排有人放風，叫價去到140萬，傳聞貴價茶餐廳翠華（1314）有意承租，佢問過翠華老闆李遠康，對方話「賣100蚊杯奶茶都交唔起租啦」。
之後又傳出有名店承租，結果不了了之。新近竟然有人走去問翁老闆，有冇興趣租咗阿一個舖，開價100萬，搞到翁老闆哭笑不得。
阿翁喺駱克道個舖，月租40萬，今年初亦有消息指，大廈業主委託代理放售全幢物業，市傳叫價7億，1月尾截標。翁老闆話，到𠵱家都冇聽聞轉業主，之前有經紀莫名奇妙打電話問佢係咪6億買起全幢，「實情係嗰度冇人租，呢度冇人買」，難怪佢鬧爆市場傳聞滿天飛，擾亂視聽。
李華華
mailto:[email protected]