原名張淑芳的年輕畫家瑪露迪（Melody），總是那樣矛盾。生得高大，小學時偏偏是被欺凌的對象。自稱公主，卻從不相信童話。父母是精神病人、會考四分，無學業無事業無家底，行年30的小妮子，有一百個理由憤怒控訴，但她卻說不！今日的「公主」，既開畫展，又建立時裝品牌雙棲發展，最近還四出與不同青年團體合作，主持分享會，以自身經歷勉勵年輕人。「沒人愛也千萬要愛自己」！瑪露迪公主如是說。記者：呂麗嬋
瑪露迪在西環一個私人畫廊，本月初開了一個名為「公主隧道」的個人作品展。不足一百平方呎的畫室，放了她自08年至今五年間的作品，「人生就好似行一條未可知的隧道，有害怕有驚惶，但我好感恩，環境再惡劣都好，仍可以創作」。2011年，她創作了一幅名為《我不是童話》的木板畫，顏色七彩繽紛，小人兒在蘋果樹下，但城堡上，卻橫空有條巨型閃電！
父母患精神病
「細個人人都希望自己係灰姑娘，遇上白馬王子」。這幅畫，是她對童話世界的憧憬，但現實每每事與願違。「我好早熟，小學已生得好高大，但就似嚿飯，粒聲唔出，成日俾啲矮我一截嘅同學蝦：踢我書包、工作紙又專登唔傳畀我…」被同學仔欺侮，今日的孩子都會向父母投訴，但她卻選擇啞忍。
「屋企已經好多問題，唔想再添煩添亂，好細個我已知爸媽有病（精神病）……佢哋食住藥嗰時，同一般人其實無分別…」但人言可畏，街坊的閒言，令她抬不起頭，「自細就好孤獨，心底好自卑，中學時都只敢同啲俾人叫美極豬扒嘅慘情同學做朋友；後來大個啲，見到同學化妝，我又跟住化，以為扮靚啲，就會多啲朋友」。
就像白仙勇筆下《寂寞的十七歲》，她的青蔥歲月灰暗慘淡，好不容易捱到畢業，會考四分，淪為雙失，前路茫茫，「我係首屆展翅計劃學員，當年好多人話展翅只係減少雙失數字嘅時代產物，但於我而言，卻是人生嘅轉捩點」！畢業後被轉介到灣仔一間社會機構做PA（活動統籌），家住粉嶺鄉村的她，因為路遠，隨身帶本圖畫簿畫畫打發時間，殊不知卻讓她遇上伯樂。
開設時裝品牌
「讀中小學成績都好差，唯有做壁報先會俾人讚，不過畫畫出書就真係發夢都無諗過。」不快的童年、孤癖的性格，成就了她以圖畫作為情感宣洩的窗口，「嗰時因為做活動助理，識咗延續教育中心嘅負責人，佢睇過我啲畫，竟主動提出幫我出書！」機會從天而降，Melody直言受寵若驚，2005年11月，由她包辦圖文的個人繪本《我不是雙失》出版，從小信心缺缺的她登上天堂，但她笑言現實畢竟不是童話，熱哄過後，她又打回原形。
「我並無一書成名！好失落，太陽如常升起，但我並唔係一無所穫，起碼堅定咗我對畫畫嘅喜愛，不再認定自己一無是處。」出書後翌年，她以半工讀方式報讀了中大課程，主修純藝術，又兼修時裝設計，開設時裝品牌「PrincessofMelody」，重新上路，「Melody係我嘅名，亦係旋律嘅意思，每個人其實都可以為自己嘅人生編造獨特嘅旋律。」她說。