湖人周二作客魔術，係超人中鋒懷特侯活轉投洛城「1哥」之後，首次重返奧蘭多作賽。之前佢為求轉會反口覆舌，搞到滿城風雨，魔術球迷又點會放過佢？雖然全場球迷以行動作冷嘲熱諷，但係都阻唔住懷特侯活獨取39分及16個籃板嘅出色表現，湖人亦因而以106:97擊敗主隊。
魔術迷：大佬唔做做契弟
球迷為求令超人難受，方法真係層出不窮，有唔少球迷着番佢件魔術波衫，但係就將佢個名Howard，改成coward（懦夫）；明寸懷特侯活轉投強隊行為懦弱，唔敢同球隊共同進退。仲有球迷喺比賽中不停叫「Kobe's kid」，話超人喺魔術有大佬唔做，寧願去湖人做拜恩「契弟」。每當懷特侯活掂波，球迷都即時報以噓聲。仲有奧蘭多電台特登買咗個廣告牌，上面有電子跳字顯示畀當地市民知，超人幾時會走人，真係搞笑。