香港國際七人欖球賽又打到嚟，本月22至24號開波，國泰（293）同滙豐今年齊齊冧莊贊助，滙豐又搵班分析員寫份搞鬼嘅賽前分析報告，雖然有啲無厘頭，但可以增加比賽娛樂性。
滙豐舊年份報告得兩個分析員估中斐濟奪標，自嘲搵八爪魚阿Paul仲好過，今次18位研究部阿頭堅持再接再厲，當中最多人，即係5位估斐濟衞冕，包括鬼馬零售分析員Erwan Rambourg。
佢搞笑話，講親零售一定要提中國，今次中國冇份打波，佢終於唔使講自由行了。地產分析員Derek Kwong就呼籲大家入場唔好提印花稅、政府出招、我鄰居啱啱買或賣咗個單位之類，大家平日已經講夠了，入場睇波就專心啲啦。