大笨象加新造按揭利息0.25厘，雖已事先張揚，仍是樓市警號，加上美國經濟持續復蘇，隨時提早加息，配合政府連番辣招，樓價仲係咪只升不跌？合和（054）、長實（001）、新世界（017）及鷹君（041）近排齊齊分拆項目發售或上市，樓市見頂味道濃。
有人覺得美國暫時唔會加息，但只要有加息預期，股市就會提前反映，昨日恒指插水相信與此有關，戰友不得不防。當股市跌得咁上下，樓價就會開始下滑，次次都係咁。魏力相信股市中期向上的趨勢已逆轉，未來要捱一段日子，入市要相當審慎。
有戰友問短炒業績股有何選擇？研究過後，葉氏化工（408）是可冷吼之選。葉氏主要做溶劑、塗料及潤滑油，屬傳統踏實工業股，市況不穩，反受資金追捧。去年中期純利增20%至1.2億銀，派息10仙，表現穩健。過去半年股價炒高五成，下半年業績值得憧憬，催化劑有三個：溶劑價格回升、油墨定單急增，以及丙稀酸丁酯新生產線投產，帶來新增長動力。
以全年盈利增長四成計，純利為2.8億元，每股盈利0.5元，現價預測PE約15倍。戰友可待業績公佈，細閱分部業績及前景後再評估，唔一定要趕於業績前落場賭大細。
魏力
http://www.facebook.com/2012jason