早上經過pantry，見到一班同事七嘴八舌，指着份報紙議論紛紛，還以為我司主席又見報。自認觸覺靈敏且天生好奇，我當然唔會錯過八卦的機會，亦可以趁機和同事聯誼一番。原來是「牡丹樓」（呢個係主席用嘅暗語，仲話佢讀書嗰陣好興喎）舉辦「全城早餐日」，免費送出23萬個煙肉蛋漢堡，派包益街坊，並乘機「藉以宣揚進食早餐的好處及重要，顧客吃完早餐後充滿動力」云云。
物價高企不下，加上租金壓力，食肆小店生意難做，平價招徠自然是求生自救的良策，起碼能夠吸引一班街坊捧場客支持，賺取微薄的利潤。近日有傳媒報道，荃灣有間30蚊任食的茶餐廳，報道一出，茶餐廳門外馬上大排長龍，生意客似雲來（然後隨即加價至40元，見好就郁，這是後話）。
舉健康旗幟 派垃圾食物
為求生計搵兩餐，小店以「價廉」作招徠，實在情有可原。不過連大商戶都玩平通街，甚至是免費派包贈街坊，小秘對此做法實在不敢恭維，邊有「咁大隻漢堡隨街跳」先。莫說此舉有以本傷人、頂爛市之嫌，平日偷偷加價已暗刮民脂民膏，家陣免費派包又似以膏還膏，搞到周街到處是肥仔肥女。
是次派包用意，除了是搞gimmick、造聲勢、賣廣告之外，實在萬無一是。點解唔直接落區派包益街坊，或送暖予低收入家庭或露宿者呢？再者，此餐廳的食物以junk food為主，還記得那套美國電影《不瘦降之謎》，男主角30日內每餐都食漢堡包，最終慘變肥仔的情景，至今依然歷歷在目。
從此，我對此餐廳避之則吉。不過我哋主席另有一番見解，記得有次陪佢出席飯局，席上有位懶有品味的先生，在其面前多番提到快餐都是junk food，非人所食。主席即插嘴：「口味嘅嘢就好個人，不過論對動物嘅殘害程度同健康影響，你食緊嗰嚿鵝肝仲差。」其時情景，同樣歷歷在目，主席嘅言行有時都真係幾「非人」，雖然佢成日話自己食「牡丹樓」啲漢堡先係人性化嘅行為喎！
都係講番派包，口說鼓勵大家食早餐，冠冕堂皇地高舉健康的旗幟，卻派290千卡路里的煙肉蛋漢堡，點解唔派清新健康的沙律粟米粒先？每次街上有免費贈品，總會見到一班長者不辭勞苦咁排隊，日曬雨淋。
家陣派包活動，恐防又會淪為另一宗「輪飽大災難」，到時又會苦了一班公公婆婆排餐懵，與其係咁，倒不如認真考慮送包畀社會上更有需要的人，回饋社會，還可藉此扭轉企業形象。
不過這樣小恩小惠的行銷手段，同港府無異，小秘都係講嗰句「唔buy囉」。
編按：是日由盧主席秘書Joycelyn執筆。
Joycelyn