中大噚日舉行「沙士十年─醫護專業人員研討會」，邀請多名醫療界人士主講，包括當年講過「香港冇爆發」而畀人鬧爆嘅時任衞生福利及食物局局長楊永強。男人果然較襟老，久未露面嘅佢外型無乜變，依舊官仔骨骨，可以話歲月不留痕。佢演講時提到自己喺中大已展開新生活做學術研究，但之後記者再問佢十年感受同近況，就乜嘢都唔肯答，急急腳走人。
劈炮唔撈去遊埠嘅衞生防護中心前總監曾浩輝噚日見到記者又係快閃。話說女記者們見到曾醫生，就即刻打招呼同講句「好掛住你」，點知佢見俾人圍就話「人有三急」閃咗去，之後又話不在其位唔講咁多，唔做訪問。