利物浦宣佈下季改用劃位收費，按座位位置訂票價，仲順便加埋價，加幅最多9%。喺球隊成績差嗰陣講加價，球迷當然非常憤怒，佢哋話自己忠心耿耿，但紅軍就從來都冇為佢哋着想。
加價後，最貴嘅成人票會係850鎊（約9,800港元）一張，呢隻門票嘅加幅係5%。至於最平嘅季票就要710鎊，相比隔籬愛華頓嘅427鎊，收費的確高唔少。紅軍球迷組織「山奇利精神（Spirit of Shankly）」話，加價係對長期利物浦球迷嘅侮辱，仲話票價由89年起已經勁加咗716%！
利物浦方面就話在商言商，佢哋上年已經凍結咗票價，經過詳細嘅考慮後，先決定改票制同加價。其實，𠵱家利記嘅票價比上不足，比下有餘，只係英超第9貴。