梁振英噚日邀請民協馮檢基、新同盟范國威、公專聯莫乃光同教育界議員葉建源到禮賓府食早餐，佢哋開餐嘅地方，係一間放滿中式家具嘅房，當中6塊木造嘅竹紋屏風，吸引咗咖喱范嘅眼球，事關咖喱范素來鍾情中式佈置，佢自己嘅辦公室都係古色古香，難怪對呢塊屏風一見鍾情，仲話相信呢塊屏風係古董嚟嘅，可惜唔知係梁振英私伙抑或前人留低。早餐期間，梁振英照舊虛應政改問題，但講到樓市就懶上心，八方聽聞，佢食食吓突然拎部手機出嚟睇，話要睇吓樓市交投量，睇吓壓抑樓價措施有冇效喎。連食早餐都要做騷？Over咗囉。