兩會期間，中聯辦主任張曉明指特區政府在處理中港矛盾時，要懂得換位思考，擺明係衝住振英港人港奶政策而來，兜巴星落去。內地官員一樣要考慮內地民情，唔會盲目挺梁。振英上台前，眼見中港矛盾越來越尖銳，乃一改前朝曾蔭權政策，走上民粹，試圖在兩地矛盾中抽抽水。佢第一式「港人港地」、第二式「停雙非」，賺到民望，如果唔係僭建事件搞砸，民望早已大幅反彈。
地皮改用途 難過城規
咁啱俾佢又遇上奶粉事件，本來只不過係一兩隻牌子缺貨，人為製造短缺，政府唔應該自亂陣腳，但為咗討好民粹，振英來個大龍鳳，搞「港人港奶」，結果就出事，內地民情及官員集體大反彈，𠵱家唔知點收科。
呢種民粹反智施政方式，早已在房屋土地方面搞到怨氣沖天。為了扮有型，自我吹噓，顯示政府已重奪土地供應主導權，在財政司及地政官員反對下，由梁粉猛將陳茂波宣佈取消勾地制度，又將22幅仍未改劃作住宅用途地皮，納入下年度賣地表，令外界相信可提供8,000個私人單位。結果名單一出，立即被傳媒踢爆。屯門愛琴海岸對開地皮，政府兩個月前先至收回，本用作擴闊路面，𠵱家放入賣地表，居民大力反對，已開始上街抗議。另一幅鯉魚門海鮮街露天停車場，用來起樓，商戶又誓死反對，因為原本車位已不足，若冇咗露天停車場，真係搵鬼去，商戶又準備上街反對，仲未計浸會大學師生因中醫院用地所起爭拗。
陳茂波明知好多地皮改用途係過唔到城規會，但為咗推卸責任，搶先公佈，若最後埋單起唔到8,000個單位，就由反對居民及城規會孭飛，大大聲話唔關我事，推得一乾二淨。更無恥係挑動社會內部矛盾，人民對立，令社會折騰。呢種問責官員，早就應轟佢落台。政府本身係有責任有計劃覓地起樓，現時亂七八糟夾硬起牙籤式公屋私樓，根本就係反智。而成個政府撲去搞住屋，到頭來經濟變差，加息周期到，樓市一崩，又再次重演老董式衰退。如此低水平之愛國愛港「精英」管治下，唔單止本地中產、專業、商界頂唔順；相信好快連廣東省同北京官員都頂唔順！
添馬男