快餐龍頭麥當勞宣佈，下周一舉辦「全港早餐日」，將免費派發23萬個煙肉蛋漢堡，總值超過300萬銀，公司話希望透過活動推廣食早餐嘅重要性。雖然早餐食漢堡包唔係太健康，但麥當勞使幾百萬派包，宣傳效果肯定好過賣廣告。如果狼英政府班高官肯捐一個月人工幫吓貧苦大眾，民望話唔定都會大幅反彈。
大市劣勢未改，噚日第三次衝擊50日線無功而還，但今次冇咁好彩，埋單跌近1%，即將考驗10日線支持力。市況疲弱提供低吸機會，打穩陣波可吼實防守性高股份，快餐股大快活（052）連續七年有息派，抗跌力一流。截至去年9月底，大快活半年賺6,401萬銀，按年增一成，毛利率由13.7%擴闊至14.5%，現價年度化市盈率16.5倍，較同業大家樂（341）嘅30倍平近一半，息率更高達6厘，啱晒食息一族。大快活近月在17元上下浮游，非常硬淨，要低吸非趁恐慌時刻不可，最佳切入點係16元樓下，中線持有博財息兼收。
唐牛