傳媒界噚日最HOT嘅話題，非無綫靚女主播周嘉儀盛傳同男主播拍檔許方輝撻着莫屬。本來郎才女貌，擦出火花都冇乜嘢大不了，但男方係有婦之夫，即時惹起熱論。據聞兩位當事人同樣喺日前申請放假。
噚日有周刊報道，現為首席女主播、31歲嘅周嘉儀，疑戀上大佢17年嘅已婚男上司、新聞部總採訪主任許方輝。八方四出打探，發現呢個傳言原來已喺圈內傳咗一排，唔少人都見過佢哋出雙入對，尤其報完6點半新聞後，周嘉儀仲會坐許方輝嘅車一齊放工㖭。
二人即時申請放假
唔少行家因此私下竊竊私語，事關許方輝嘅太太係亞視前主播陳佩琳，同好多行家相熟，據知許氏夫婦早前仲一齊去旅行，表面冇乜嘢異樣，難怪唔少陳佩琳密友聽到呢單緋聞，都話好驚訝。八方聽聞，佢兩個早前一齊報6點半新聞，疑似因此日久生情。據知無綫新聞部高層，得悉坊間傳佢哋兩位撻着後，即時向兩人照肺，了解後發現事關重大，隨時影響新聞部公信力，結果呢？周嘉儀即時放假，許方輝隨後亦申請放假。兩人幾時復工？唔知喎。
周嘉儀向來係宅男女神，有好多粉絲，盛傳戀上男上司，即時令好多宅男粉絲心碎。但亦有網民留言，話許太陳佩琳都好靚，點解會搞成咁？坊間仲流傳有周刊影到許、周兩人親暱舉動，唔知會唔會再令無綫新聞部大地震？
李八方
mailto:[email protected]