地產代理監管局主席陳韻雲，本身愛買磚頭保值，又有經營服務式住宅，身家有番咁上下，就連佢都狂呻政府出招壓樓市，加埋銀行收緊按揭，對佢都有影響，投資成本增加。
陳韻雲係本港老牌地產商永傑集團老闆陳澤儒位千金，冇靠父蔭，自己創立「V集團」經營酒店同服務式住宅。噚日佢間V Wanchai開幕，提供79間房，V集團𠵱家有6個酒店同服務式住宅項目，約涉及400個單位，粗略計算，每個月閒閒哋收租過千萬。
佢噚日有感而發，話「以前用3蚊可以買到7蚊嘅嘢，𠵱家10蚊至買到13蚊嘢」，成本大增；以經營酒店為例，起碼要五、六年先返本。佢寄語，買嘢唔好急、唔好追，要計算清楚。就連有實力嘅都咁講，大家真係要停一停，諗一諗。