社民連主席梁國雄上月中喺立法會議員辦事處內，疑似擔住口煙打呔兼換上西裝，準備到禮賓府狙擊梁振英。佢呢個咁型嘅一刻俾黨友影咗兼擺上網，結果俾人話佢違例喺室內食煙，要秘書處跟進。
八方噚日路過長毛立法會辦事處，見到兩個控煙辦嘅職員入咗去，望兩眼之後就出返嚟，據講佢哋係做緊「例行巡查」喎。
控煙辦職員到訪時，長毛咁啱落咗樓食煙，所以同佢哋緣慳一面；當佢返到去辦事處時，只見枱面上多咗兩張禁煙貼紙。
八方追問控煙辦人員，係咪收到關於長毛嘅投訴，定係70個議員辦事處都會巡？但對方好似好趕時間咁，粒聲唔出就急急腳走人。