噚日中午煲呔同太太曾鮑笑薇出埠。大家咪以為，佢哋又係過大海去澳門喎，因為呢次佢哋係去台灣，相信唔會再坐富豪提供嘅私人飛機或遊艇去「大玩」啩？
據聞煲呔卸任後，多數都係去內地旅行；至於今次去台灣做乜？消息話係「私人行程」喎，只係帶咗一名隨員同行，唯一知道嘅行程，係佢哋會去台南參觀，預計星期日返香港。
雖則係過氣特首，仲畀廉政公署查緊，但煲呔入境時，台灣都有畀佢特別通道禮遇通關。唔知去到台灣，仲有冇香港傳媒會追蹤佢呢？台灣陸委會噚日表示，煲呔近日申請到台灣探親，行程屬私人性質，陸委會基於「禮遇、尊重、便利」原則，兼顧煲呔嘅身份同人道需求，幫他辦妥去台灣嘅事喎。