上星期五係三八婦女節，唔少公司都有搞活動慰勞女性員工，但咁樣係咪代表公司重視女性呢？噚日一個渣打贊助嘅研究報告，就唔係咁睇。報告話，50隻藍籌股、合共649個董事職位中，只有61個由女性擔任，佔總數9.4%；女執行董事數目仲冇變到，維持得15位，佔執董總數6.9%。
邊類型公司有最多女董事呢？原來係銀行，女董事佔比最多嘅頭十間公司，有一半都係銀行。其他唔講，恒生銀行（011）咪就係由一姐李慧敏打骰囉。搶到第一名係建行（939），12位董事入面，有4位係女士，但全部都唔係執董。
港交所（388）舊年建議上市公司加入多啲女董事，睇來長路漫漫。