為令波牛更「文明」，開賽前特設握手禮儀；豈料弄巧反拙，近年握手禮反成雙方將心病公開的最有效途徑。日前英足盃賓尼迪斯又怨聲載道，話喺球員通道口等咗費Sir一輪，點知人哋唔同佢握手喎。唔知點解，明明好似費Sir理虧，我都無同情肥賓。費Sir在英國領隊界一直聲望甚佳，人緣嘅嘢，無得強求嘅！
近年球場上拒絕握手的「組合」，多牽涉種族歧視，如上季安頓費迪南與泰利；去年2月有艾拉同蘇亞雷斯。其中最有趣一對，我會選布歷治與泰利；二人反目非因種族，而是布歷治揭發泰利除咗球場個更衣室，仲「分享」過佢另一啲嘢！布歷治的手略過泰利那刻、泰利呆在當場那表情，至今球迷還津津樂道！但今季當曼聯作客利物浦，適逢希斯布祿球場慘劇報告剛公開，為尊重當場紀念慘劇的紅軍球迷，艾拉與蘇亞雷斯放下私人恩怨進行握手禮，亦是真男人的表現。
既然握手禮惹起咁多爭端，曾拒絕與史篤城領隊普利斯握手的曉士，便索性提議將之取消。英國亦有心理學家指，握手禮未必可提倡公平競技，反而是向對手施加心理戰的好時候。有傳一位英國低組別聯賽球員，每逢賽前握手都會唸唸有詞，向對手講「你係垃圾！」、「祝你下季要去麥X勞打工！」等句子。我就認為越有這些人存在，便越需要握多啲手，越要宣揚體育精神的大道理。
方柏翹
now足球評述員