【沙士疫變10年：痛苦回憶】
沙士期間，淘大商場的地產代理全部撤離，在九龍灣從事地產代理十多年的黃家明（Ricky）當年也有份走難，跟其他同事一起調往德福分行，「當時根本冇客人，成交幾乎係零，返工等放工。」
「怕傳染家人 自己住油塘」
沒單開的日子，依靠底薪5,500元過活，還因為經常出入淘大花園，「唔知道會唔會中招，擔心中咗招，會將病毒傳染畀親友。」於是一個人住油塘，父母留在沙田，「一個人住，附近餐廳冇開門，持續兩個月，日日食一餐公仔麵。」
當時有些買家「趁你病攞你命」，「有啲業主想離開傷心地，有個400幾呎單位，被還價40萬元，最後冇成交。當年嘅業主，好慘！」今天他仍然記得N座一個494方呎的低層單位，在03年3月以51萬元成交，建築呎價是1,032元，「今日同類型單位呎價已升至8,000多元。」
有些代理冇單開，選擇轉行，他轉做租務市場。他說，有些淘大居民想暫時離開，託他去找德福花園租盤，「我問德福業主，佢第一句就問係咪淘大居民，一聽到係，莫講話租，就連上門睇盤都拒絕，因為業主根本唔想佢哋嚟。」後來，那位淘大居民租了觀塘麗港城，「個業主知道佢來自淘大，二話不說就出租，因為好想幫助佢哋。」