首先解答一讀者有關昨文的疑問：「不是說豆腐餐有五道菜的嗎？怎麼只介紹四款？」這位先生確係認真，搞到好似係我出少咗個餸畀你咁滯。其實食完六塊湯豆腐之後，我深信已然掌握豆腐「真味」，同「真係」飽。
點知還有一道後上，就係野菜（亦係京都名物）天婦羅，當時已經食不知味，只記得塊「大葉」（即係紫蘇）炸得幾靚。而之前一行數眾就算未能學似其他座上日本客咁摒息靜氣、聚精凝神地各自享用料理，起碼都會低聲輕語去品評食物。可惜飲飽食醉之後，大家就開始瞎聊，咁就出事了。
被人叫人渣 好過叫支那
總之就係越傾越興奮，越講就越大聲，我當自認不諱，而各人分貝輸出，尤以我最高，亦不自覺是一回事。跟手一位歐巴桑（日文「大嬸」的音譯）店員，急腳走到我的身旁，講咗兩句，唔知係咪英文，總之唔明，不過再嚟動作配合，實在有啲日本「能劇」功架，佢將隻手慢劃半弧，再直向置於嘴前，我就恍然。有情面的說法，是示意我輕聲點，直接啲講，就是叫我最好閉嘴。來而不往非禮也，我除了以世界通行的「耍冧」手勢回敬，並反覆補上我僅懂得的日語：「sumimasen/gomenasai」，仲即刻比劃要埋單，狀似落荒而逃。
同行友人見到我一副辳樣，唔知係真心開導，定係想藉機踹上一腳，竟然同我講：「唔使咁緊張喎，你咪當自己係支那人囉。」當自己係支那人？！這明顯唔關乎我在日本境內，應以中國人定香港人身份自處的矛盾，而係一種近乎自虐的行徑。事關「支那人」，又或「強國人」之名，都是隨着這幾年中港兩地「被融合」，所造就的衝擊和衝突之下，本地民眾對內地人的貶稱。甚至我見過有網民留言：「被人叫『人渣』都好過話佢係『支那人』！」所以這麼沉重的稱謂，我又如何擔當。
其實曾幾何時，香港旅客的污名，亦不讓內地同胞的劣績。港人大聲（人辦有我）、喧鬧、無禮（入鄉不隨俗）、驚執輸（享用自助餐的食相，慘不忍睹），這些都是我們不能抹去的外遊往績。隨着社會進步，港人的質素和眼界自然提升，少出洋相。而港境之北的大國，亦在短短幾年間奮然崛起，富起來的民眾，成為全球旅業大戶。國人粗野、霸道、自私、缺德的品行亦隨之名揚四海。
過氣「強港人」又豈及新貴「強國人」，自然就給比下去。現在剩下的，可能就是我這種衰咗還是會有丁點「唔好意思」的覺悟。
盧先亞