財經事務及庫務局局長陳家強鍾意睇戲同打高球，閒話家常時，呢兩個話題確實最易傾，可惜局長最近忙住睇實樓市，留意「加辣招」對樓市嘅影響，完全冇時間入戲院睇戲，早排攞獎嘅奧斯卡電影都冇乜點睇。
局長話，最鍾意睇有關政治同暗殺嘅電影，科幻片就唔係佢杯茶，好似《22世紀殺人網絡》、《潛行凶間》呢類戲，睇到佢一嚿雲。照咁講，《林肯》同《ARGO－救參任務》一定啱佢睇啦。
講番加辣招，政府上月22號出招前，市場流傳有關政府出招嘅惡搞手機短訊，甚至假嘅政府新聞公告。局長話，市場成日傳政府出招，但喺政府負責籌劃招數嘅人其實相當有限，外間根本冇可能真確知道政府幾時出手。唔知佢哋係咪好似《寒戰》咁，每次都為出招整個「行動代號」呢？