咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【牛腩篇】近期關心的兩宗新聞，都同核電有關。
台灣正舉行大規模遊行，希望政府收回興建第4座核電廠決定，或者作為膚淺嘅港男，我有留意穿三點式示威嘅台灣正妹，不過更加尊敬佢哋和平表達訴求嘅決心。
另外，周一係311大地震兩周年，猶記得兩年前小弟正上班途中，同事還準備即將展開嘅日聯，結果發生悲劇。好彩日本人嘅民族性極強，好快已經企番起身，如果關心日本同日本足球，小弟推介大家睇一套以重災區仙台嘅球會維加泰為主軸嘅紀錄片，名為《Football, take me home》，暫定今年秋天上映，大家亦可去網站 http://www.vegaltamovie.com/，睇住預告片先。
新一季日聯亦都如期開鑼，開咧最勁係橫濱水手，2戰2勝兼轟入9球；當然面對歐洲球會嘅挖角，日聯近年嘅星味大減，稍具質素球員都外投，不過水手算保持一定星味，老牌球星仲有中澤佑二、中村俊輔同馬昆奴斯，特別去過意甲同蘇超嘅中村俊輔，更加回勇。
小弟數年前因工作需要到日本採訪日聯，亦都去過橫濱世界盃球場睇過水手嘅比賽，初次睇J League，一定會畀球迷又整齊又熱情嘅打氣聲感染，最厲害係佢哋可以全場90分鐘都不停叫喊，而且佢哋入球點慶祝，輸波點叫球員振作，都練定晒；講真，有時比正式比賽仲好睇。香港幾時又培養到一班如此真心支持本土球會嘅球迷呢？文：牽牛