今年初阿里巴巴主席馬雲宣佈唔做首席執行官（CEO），令市場嚇咗一跳，噚日馬雲就喺杭州向員工宣佈，被佢稱為「老陸」嘅陸兆禧將於5月10號起出任阿里巴巴集團CEO，成為佢嘅接班人。
「老臣子」年僅43
香港股民對老陸應該唔會太陌生，事關佢係私有化前嘅阿里巴巴CEO。雖則叫做老陸，但陸兆禧只得43歲，喺阿里做咗13年，絕對係老臣子，幾乎做過集團每一個部門，除咗阿里巴巴，最為人熟識嘅支付寶同淘寶，佢都做過，要佢做集團CEO應該冇乜難度。
馬雲亦盛讚陸兆禧「對新事務的欣賞和學習能力，對關鍵問題的判斷和決斷力，以及強大的執行力」，講到尾，做得領導層，最緊要肯接受新事物，肯做決定，同做到嘢啫。