海迪早前和一名做珠寶生意的老行尊食飯，講起周大福（1929），他個人就話唔理解公司策略，尤其是留意到佢哋近來中、港兩地開舖越來越「濫」。例如在馬路正對面連開兩間大舖，又或者連蚊型、猶如便利店大小的位置都不放過。老行尊話，相信周大福計過條數，以賣珠寶的單價及10%以上的純利率計，每個舖要做到足夠生意繳交燈油火蠟並唔難，但咁樣做效益唔會高，營運水平亦肯定唔喺最optimum。
一般來講，龍頭公司會以「仙女散花」式開舖，很可能是想迫退其他競爭對手，整合市場；但以周生生（116）及六福（590）發展到呢個規模，基本上已經迫唔走，所以周大福咁急開舖為乜？如果純粹為一句上市時講大咗的開店目標，咁海迪會有點擔心：到底面子重要啲，還是盈利能力重要啲？
周大福最近的1、2月同店銷售表現，雖較上一季已經有顯著改善，但管理層亦向券商表明，內地生意短期都好難回復增長，而新開分店亦要用更長時間去ramp up，反映公司效益正在下降。其實以周大福採購能力、供應鏈的反應速度，加上財力，真係可以贏同行成條街。佢最大的敵人，其實係佢自己。
海迪