華華周日晚上去演藝學院睇香港藝術節嘅京劇節目《慈禧與德齡》，發現新地（016）大股東郭炳聯、嘉華國際（173）主席呂志和、恒生銀行（011）一姐李慧敏同佢老公袁天凡都係觀眾，可見無論係富豪、中產還是平民，精神食糧都相當重要。
《慈禧與德齡》改編自香港話劇團一套相當出名嘅話劇《德齡與慈禧》，08年喺北京演出後，被中國國家京劇院睇中，改為京劇，2011年首次喺北京演出，之後喺內地好多城市公演，今次「回流」香港只演兩場。
中場休息走去問呂志和同郭炳聯係咪睇開京劇，呂志和笑咪咪話睇吓「新潮嘢」，郭炳聯就反客為主，叫人介紹多啲劇目佢睇，見佢完場時企起身拍手，應該都相當滿意。睇到呢到，大家可能最想知道呂、郭二人有冇女伴一齊睇？答案係有，不過唔係妙齡。