利物浦同埋皇家馬德里喺周日聯賽同樣有驚無險贏波，紅軍主場迎戰熱刺靠對手送禮以3:2險勝，向爭逐前4位置邁進一步，仲係今季第一次過同市死對頭愛華頓頭；皇馬作客切爾達，對手完場前攻門中楣執番身彩險勝2:1，亦都係第一次追過馬體會，今季西甲首次升上次席。除咗有運之外，利記皇馬贏到波，各自嘅王牌7號蘇亞雷斯同埋基斯坦奴朗拿度（C朗）當然都係功不可沒。
利物浦主場迎戰熱刺，由蘇亞雷斯一記靚絕窄位射門先開紀錄；雖然熱刺由維頓漢梅開二度一度反超前，但熱刺之後兩次致命回傳都俾紅軍把握到，達寧扳平之後由阿蘇博到12碼，謝拉特主射奠勝。
阿蘇表現勝巴利
呢場勝仗對紅軍嚟講好有意義，全取3分之後以得失球壓過少踢1場嘅同市宿敵愛華頓，亦保持爭前4位置嘅希望，目前落後第4位嘅車路士7分。相信車路士同阿仙奴亦都會多謝利物浦，熱刺喺英超12場不敗斷纜，令到前4形勢變數更大。對蘇亞雷斯嚟講，再入一球後以22球喺射手榜拉開領先優勢，今場嘅表現亦喺對手加里夫巴利之上，喺英格蘭球員先生競選上相信拉到唔少票數。
紅軍呢排勢頭咁好，領隊羅渣士賽後話，未敢諗攞唔攞到下季歐洲賽席位：「可唔可以爬過愛華頓，其實並唔重要，重要係我哋可以繼續進步。𠵱家我哋只會將焦點放喺下一場比賽，唔會諗歐洲賽席位呢啲咁遠嘅事。」
C朗終於威過美斯
皇馬喺上周二同曼聯激戰之後，作客切爾達喺正選陣容上換咗7個球員，不過C朗依然正選。場波一直老鼠拉龜，喺61分鐘靠C朗打破僵局補射入網；雖然主隊喺兩分鐘之後就扳平，但皇馬喺72分鐘靠卡卡博到12碼，C朗主射再次領先。補時前，皇馬幾乎要嘔番兩分出嚟，主隊後備入替嘅前鋒朴主永無人看管頭槌攻門，可惜中柱唔入。
由於馬德里體育會喺同日稍後嘅賽事，爆冷主場以0:1輸畀皇蘇，皇馬終於喺今季首次升上第2位，雖然依然落後榜首巴塞13分，但對刺激士氣都有重大意義。C朗今場波梅開二度，亦都達成到美斯都做唔到嘅紀錄，成為西甲史上唯一一位喺首4個球季都入到至少25球嘅球員。加埋其他賽事，C朗喺今季上陣42場入42球，入球效率真係好犀利。