咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【咖喱篇】究竟費格遜想刻意淡化7號球衣嘅傳奇，抑或係佢老人家睇錯人呢？路爾斯華倫西亞今時今日嘅表現唔單止配唔起件7號球衣，亦配唔上曼聯右翼呢個位。
眾所周知，華西係一隻好傳統嘅翼，只係識衝落底線傳中，腳法麻麻但勝在速度快，單蹄馬得隻右腳都仲叫出得咗吓波。小弟以前覺得佢唔係勁，更加談唔上全能，但憑僅餘嘅優點，佢都有啲作用，係個唔錯嘅輪換球員。不過，華西下半季嚴重退步，到周日曼聯對車路士嘅英足盃8強，小弟終於對佢忍無可忍，要狠狠地插佢一鑊！
華西呢場後備入替拿尼，每人踢半場，令球迷可以清楚睇到呢兩隻翼之間嘅級數差幾遠！面對艾殊利高爾，華西連硬爆過人嘅必殺技都用唔到出嚟，喺右邊做唔到突破，成日都回後或者橫傳；同埋佢出波比以前差咗，好似瞌埋對眼是旦傳出去就算。
睇番呢場嘅數據，華西27腳傳球得15腳到位，成功率得56%，撇除門將，佢嘅傳球成功率係兩隊所有球員最低。另外，華西4次傳中，次次都搵唔到自己友，仲記得有球係底線傳底。
另外，香川真司喺呢場英足盃都踢得好沉，個人覺得佢嘅位置踢得太後，好多時都係做駁腳同防守。如果要做呢啲工作，曼聯其實用路爾斯安達臣仲好，因為安達臣嘅體能同身位都好過香川好多。文：咖哩