孫柏文先同大家更新吓先，對上三個禮拜二都講嘅南華早報（583），因大股東股權超出港交所（388）要求繼續停牌。佢哋出咗通告話，一、喺邊日邊日警告過你哋會停牌；二、話已經同財務顧問傾緊點做。我都係嗰句，你一係提私有化，一係配股。
由舊年尾開始，有唔少fan屎喺facebook不停問點解我少講咗咁多關於本地及外國嘅政策，其實理由係本地政策，我感覺係講完都唔會聽，因記得以前特首梁振英仲係召集人，佢請過我哋當時係年輕搞智庫嘅人食過兩次飯，兩次都係講完好似冇講過咁。
沽日圓贏到開巷
至於外國，唔使講都知大家已經達成共識，央行將會係咁印，又要政府收緊開支。當然，大家可能會問：「不過好似意大利選咗個Beppe Grillo出來喎？」係，意大利有Beppe Grillo，睇佢98年時對成個貨幣系統嘅咆哮真係好似會推翻現況，不過以央行嘅力量，佢哋就算選咗出來，都係得個桔，得番貨幣下跌、資產及貨品價格上升作為懲罰。
例如睇日本，佢哋話想減用核能，如果減用就會大幅增加入口石油、天然氣，令貿易出現赤字。我今年第一篇文已經話「一注獨贏沽日圓」，嗰陣仲係80幾Yen兌1美元，現已跌至96，嗰日邊個價位沽Yen，喺家都係贏到開巷。當時我話睇145日圓兌1美元作第一站，現外國新債王Jeff Gundlach已話200。情況似我入股票行做石油分析員，石油賣30幾蚊一桶時，我話睇好，高盛話會見100蚊一桶一樣。
當年買中石油（857），現買經營日本零食店阿信屋嘅CEC國際（759）。唔好再拗，買嘢保平安。
昨日頁岩氣股全線仆直，最後，我隻全球頁岩氣革命概念愛股珠江鋼管（1938）將會喺22日出業績，下個禮拜二業績公佈前重點再講。
孫柏文
獨立股評人
http://facebook.com/shuen
本欄逢周二刊出