港台助理廣播處長施永遠被終止署任，打回原形，據港台員工指係因為空降AO廣播處長鄧忍光唔妥佢，認為佢冇膊頭執行整治港台嘅政治任務。𠵱家振英民望低迷，就如當年老董一樣，最就手替死鬼就係港台。
老董落台後，煲呔民望高企維持三年，港台就有三年風平浪靜期。今時唔同往日，振英政府冇可能承認自己無能，自然就將政治失敗責任諉過於傳媒，眾多傳媒中首當其衝就係用公帑嘅港台。
𠵱家問題已非將李鵬飛、吳志森等夭心夭肺眼中釘除之而後快咁簡單，而係要將港台變成政治宣傳喉舌。
港台中人戴健民、陳敏娟、陳耀華等高層，實在太天真、太幼稚，當日鄧忍光履新，第一單政治任務係收拾phone in節目，眾人夾計借節目重組，將保守周融與眼中釘吳志森一齊叮走，並由港台高層出面向民主派議員作游說，指鏟走吳志森並非政治任務，發功將泛民說服，整件事無法引起公眾注意。
此舉猶如處女下海，一件污兩件穢，政治任務自然陸續有來，做得第一次，第二次又點能夠say no呢？港台要做喉舌，將「頂心杉」《議事論事》永久調去零收視ATV，只係第一步，第二步既然冇人睇，摺埋都唔會有人知，搞掂！既然其他港台高層可以同鄧忍光合作，除去吳志森，點解你施永遠可以有唔聽話、唔執行政治任務之特權呢？
鄧忍光整治港台 博上位
可以預見下一步就會將TVB播放時段製作政治宣傳節目，畀高官上去發噏風，討好林鄭、振英，三年後鄧忍光離開港台後，仕途自會更上層樓。佢自視甚高，認為自己在AO界屬high flyer，有大把將來，自然將政治工作執行到底，有咁盡去咁盡。反而上手AO傅小慧雖同屬空降政務官，但佢冇太大野心，唔會用整治港台來作為自己仕途之功勞，所以到傅小慧離開，港台上下反而不捨。
振英管治失敗，中央要催谷傳媒撐場，再加上處長鄧忍光有所圖，港台在內外夾攻下，施永遠只係第一個目標，往後陸續有來！
添馬男