真係好唔對路!魏力講緊強勢股昨日的表現,有如血流成河。前輩教落,指數急跌前,強勢股多數先遭拋售,因為乜位沽都賺,洗倉亦特別痛快。興業太陽能(750)升足半年,昨傳出光伏補貼低於預期,芬佬即刻㩒掣掟貨。天津津燃(1265)亦出現同樣情況,無端白事兩日插兩成。遇上呢類情況,唔好問點解,沽咗先講。
戰友可能會問:美股破頂、日圓貶值、兩會後政策漸明朗,應利好港股,點解會洗倉?相信跟業績期有關。過去半年,好多股份飆升一倍以上,全因炒強國復蘇,如今業績將揭盅,萬一唔對辦到時先沽就遲,故大戶先行一步,業績前食糊,起碼袋袋平安,業績好再掃番轉頭。所以未派成績表的股份要小心,唔對路,即閃!
目前比較安全是炒美國樓市復蘇,因失業率確實回落,加上樓價反彈,銀主盤減少,負資產人數減,換樓機會亦會提高,主攻美國梳化市場的敏華控股(1999)是估值吸引的選擇。
截至去年9月,敏華中期純利按年增長54%至2.19億元;如下半年較上半年再升20%,現價預測PE不過14.6倍,較接近20倍PE的創科(669)仍有折讓。敏華昨創一年收市新高,突破機會高,目標9蚊,跌穿7.40止蝕。
魏力
http://www.facebook.com/2012jason