講開滙控（005），佢哋一班管理層據講因為美國罰錢而減收花紅，呢邊縮水，惟有喺第二邊攞番多少錢出嚟使。上周一業績公佈當日，三巨頭范智廉、歐智華同麥榮恩齊齊以同一個價錢（每股7.108英鎊）沽貨，套現咗接近4,686萬港銀（接近400萬英鎊），實在好敏感。
不過，大家唔使亂，睇番聯交所資料，三巨頭每年公佈業績當日都會沽一批股份，今年套咗成400萬英鎊，2012同2011就分別套咗300萬英鎊同500萬英鎊，有個講法話巨頭沽貨純粹係因為要進貢稅局，如果係話用嚟交稅咁都真係唔奇嘅，至於真正原因，滙控發言人就話唔評論喎。
市場上仲有一個講法，話英國稅制入面，花紅越高交稅越多，所以三巨頭唔理三七廿一，業績公佈兼董事禁售期一過就沽貨走人，淨係睇呢樣嘢，就知獅子行嘅管理層數口精，股東有福啦！