【避免上身】
LV控小商戶侵權風波令本港多間商戶人心惶惶，上環一帶的紙紮舖，有東主擔心惹上官非，近日已將多款仿LV紙紮祭品收起不賣：「無謂為咗賺幾十蚊，被人告就賠幾萬蚊，咁樣好冒險！」但記者巡查後仍發現，部份紙紮店仍有出售仿LV的手袋、皮具等紙紮品，其他國際品牌如Gucci等也有售賣，隨時可能被國際品牌控告。
「其實大家都知係假」
上環一帶的紙紮舖售賣先人祭品種類繁多，又緊貼潮流，如iPhone、iPad等最新型號都有出售，國際品牌的皮具套裝只售約40元。不過近日的侵權風波，令紙紮舖收起相關產品，其中一間紙紮舖東主杜先生稱，過去有出售仿LV的啡格手袋祭品，「其實我哋都係喺大陸入貨，呢啲都係紙紮品，大家都知係假，都係希望先人可以用名牌，但𠵱家都唔敢賣，加上呢啲產品都係80後買，老一輩人好少買，費事冒險」。
紙紮舖因售賣仿製名牌包包被控侵權早有前科，前年8月美國曼哈頓唐人街福安盛壽衣店，因發售20美元的LV紙紮手袋及仿Gucci紙紮鞋被指侵權，店員被捕控以兩項侵權罪，其後獲准保釋。
《蘋果》記者