【記者呂麗嬋報道】婀娜多姿的肚皮舞教師，偏偏罹患致命大腸癌。經歷手術、化療，體重只剩70磅，與掛在腹部的人工肛門形影不離。佘碧燕（Ada）的故事像文藝大悲劇，偏偏訪問時她卻笑聲不絕。「他永遠有本事讓我破涕為笑」，這個他，是不離不棄、每天為Ada清理造口的丈夫。Ada的重生故事，亦是一個動人的愛情故事。
「我太太好得番，我都有功勞」。在酒店做副行政總廚，王是那種說話不多，但愛插科打諢的男生，每當Ada陳述治療時的慘痛，他總不忘在旁扮鬼臉，緩和氣氛。「喺醫院嗰段日子，佢嚟探我，成日坐住我部輪椅，搞到啲姐姐（病房助理）話我好可憐：嗰老婆生癌就嚟死、老公就跛咗！」
說起最難過的日子，夫婦像說笑話，相視而笑。結婚18年，兒子都已17歲，早已是老夫老妻，但Ada笑言，越病重越感受到丈夫的愛，「佢嗰行工時好長，以前成日埋怨佢冇時間陪自己，到我病咗，日日見住佢，我喊佢又喊，先知佢咁緊張我。佢𠵱家做晒屋企嘅厭惡性工作，我嘅造口（人工肛門的便袋），都係佢日日幫我換」。
身邊人支持走出谷底
台灣人愛稱用作糞便排泄的大腸造口為「紅色玫瑰」，這個掛在小腹的外物，曾幾何時，是Ada生命中的詛咒，43歲的她，以靈活多姿的肚皮舞為傲，偏偏患的是大腸癌，疤痕、造口，無不困擾着她。
「兩年前，因為持續肚痛，睇醫生證實係大腸癌，發現時腫瘤已擴散」。術後三個月瘦了50磅，日夜嘔吐，她想過死。虛弱得連站立都無力，一聽到音樂，想起從前，淚如雨下，「除咗老公，我媽媽辭咗職，喺屋企照顧我。未病之前，我同學生編緊隻舞，佢哋竟然排埋隻舞嘅尾段送畀我，鼓勵我。」
身邊人的支持，讓她由低谷蘇醒，下定決心生存下去。體重一度跌至只有70磅的她，主動約見營養師要求增肥，又致癌協，參加互助小組，積極抗癌。
因為失去過，所以特別珍惜，撿回小命的Ada說：「我希望好好過我嘅每一日。因為腹腔嘅造口，我唔可以着露臍裝，但我仍可以着連身舞衣；有啲動作雖然未必做到示範，但我仍可以編舞，將我所知嘅教畀我嘅學生。」
