【今日小故事】
「中產」財爺兩年前唔推長遠政策,只派6,000蚊為民望止瀉,之後每份預算案都繼續hea。財爺唔做嘢,激發咗設計師Benson同一班睇唔過眼嘅小市民,將憤怒化作行動,親自落區買物資同弱勢社群分享,傳播愛與關懷。佢哋最初由深水埗做起,擴展到今年過年前夕,有近400人喺全港12區展開呢個平等分享行動。呢段咁有意義嘅經歷,最近輯錄成書《平等.分享.行動》(上圖)。Benson話,其實佢哋唔係義工,反而係每次分享行動,都可以令參與者隻眼開番,更深入咁了解唔同嘅社會問題,對地產霸權、房屋政策、老人問題等有更深刻體會。呢本書賣88蚊,版稅收入會用番喺分享行動。